|
حیزبی دیموکراتی کوردستانی ئێران قوربانیی تیرۆریزمی ده‌وڵه‌تیی کۆماری ئیسلامیی ئێرانه ره‌شید حه‌یده‌ری
|
پێناسه‌ی چه‌مکی تیرۆریزم بریتی‌یه له به‌کارهێنانی هه‌ڕه‌شه و توندوتیژی له دژی خه‌ڵکی ئاسایی و سیڤیل به‌مه‌به‌ستی گه‌ییشتن به ئامانجی سیاسی، ئایینی یان ئیدیولۆژی و ئامرازێکه بۆ له‌نێوبردن و تۆقاندنی مخالفین و کپ کردنه‌وه‌ی ده‌نگی ره‌خنه و ناڕه‌زایه‌تیی ئه‌وان.
تیرۆریزم دیارده‌یه‌کی نوێی تایبه‌ت به سه‌رده‌می ئه‌وڕۆ نییه. به‌ڵکو رابردوویه‌کی کۆنی هه‌یه و سه‌رچاوه مێژوویی‌یه‌کان سه‌ره‌تاکه‌ی ده‌گه‌ڕێننه‌وه بۆ کۆتایی سه‌ده‌ی حه‌ڤده‌یه‌م. ئه‌م دیارده ناحه‌زه به تێپه‌ڕبوونی زه‌مان گۆڕانی به‌سه‌ردا هاتووه و له سه‌ده‌ی بیسته‌م‌دا شێواز و قه‌واره‌ی نوێ و کوشنده‌تری به خۆوه گرتووه.
تیرۆریزم کوشتن، بۆمب ته‌قاندنه‌وه، رفاندنی فڕۆکه، گرتنی بارمته و به‌م دواییه‌ش کرداری خۆکوژی له خۆ ده‌گرێت. خاڵی جێگای سه‌رنج له پێوه‌ندی له‌گه‌ڵ تیرۆریزم‌دا ئه‌وه‌یه که کرده‌وه‌ی تیرۆریستی ته‌نیا تایبه‌ت به تاکه که‌س یان گرووپ و تاقمی ده‌ره‌وه‌ی ده‌سه‌ڵات نه‌بووه و نییه، به‌ڵکوو که‌ره‌سته و ئامرازی ده‌ستی ده‌وڵه‌تانی توتالیته‌ر و زۆرداریش بووه و دیکتاتۆره‌کان به‌زۆری هه‌ر کات هه‌ستیان به له مه‌ترسی که‌وتنی ده‌سه‌ڵاتی شووم و نامه‌شرووعی خۆیان کردبێت، نامرۆڤانه په‌نایان بۆ بردووه و له‌و رێگایه‌وه مخالفینی خۆیان داپڵۆساندووه و له‌نێویان بردوون.
ئه‌و جۆره ده‌سه‌ڵاتدارانه، که له تیرۆریزمی سیاسی به‌مه‌به‌ستی له‌ناوبردنی مخالفینی خۆیان که‌ڵکیان وه‌رگرتووه، که‌م و زۆر له مێژوودا ناویان هاتووه و مێژوونووسان له نێویان‌دا هیتله‌ر، موسولینی و ستالین به سه‌رقافڵه‌ی ئه‌و کاروانه ده‌ناسێنن و له ریزی پێشه‌وه‌ی کاروانه‌که‌دا دایان ده‌نێن.
ئه‌گه‌ر ئه‌و سه‌رکردانه‌ی ئاماژه‌یان پێکرا نموونه‌ی تیرۆریزمی ده‌وڵه‌تی له مێژووی مرۆڤایه‌تی‌دان ئه‌وا کۆماری ئیسلامیی ئێران نموونه‌ی زیندووی ئه‌و کرداره ناپه‌سنده له دونیای پێشکه‌وتووی ئه‌وڕۆدایه. ده‌سه‌ڵاتدارانی سه‌ره‌ڕۆی کۆماری ئیسلامیی ئێران له کوشتنی مخالفینی سیاسیی خۆیان‌دا هێنده بێڕوحمانه جووڵاونه‌ته‌وه که رووی قاره‌مانانی مێژووی تیرۆریزمی ده‌وڵه‌تی‌یان سپی کردووه. ئهوهی له‌و نێوه‌دا، پتر له هه‌موو لایه‌ک بووه‌ته ئامانجی تیرۆری ده‌سه‌ڵاتدارانی تاران و زیانی قورسی لێ‌که‌وتووه، حیزبی دیموکراتی کوردستانی ئێران بووه. تیرۆری رێبه‌رانی شه‌هیدمان دوکتور قاسملوو له وییه‌ن و دوکتور سادقی شه‌ره‌فکه‌ندی له به‌رلین و ده‌یان تێکۆشه‌ری دیکه‌ی حیزبه‌که‌مان به‌ڵگه‌ی حاشاهه‌ڵنه‌گر بۆ سه‌لماندنی راستیی ئه‌و قسه‌یه‌ن.
به‌ڕێزان!
ئێمه لێره‌دا کۆ بووینه‌ته‌وه تا رێز له شه‌هیدانی حیزبه‌که‌مان به‌گشتی بگرین. به‌ڵام ئه‌و دوو شه‌هیده‌ی ئه‌وڕۆ سه‌ردانی گڵکۆی پیرۆزیانمان کرد خاوه‌نی تایبه‌تمه‌ندی‌یه‌کی هاوبه‌شن. ئه‌وان هه‌ر دووک قوربانیی تیرۆریزمی ده‌وڵه‌تیی کۆماری ئیسلامیی ئێرانن.
به‌ڵێ، شه‌هیدان کامران هیدایه‌تی ناسراو به ئه‌بووبه‌کری هیدایه‌تی و که‌ریم محه‌ممه‌دزاده، وه‌ک زۆر له تێکۆشه‌رانی دیکه‌ی حیزبه‌که‌مان، قوربانیی تۆڕی تیرۆری کۆماری ئیسلامیی ئێران له ئورووپا دان. تیرۆرێک که کاربه‌ده‌ستانی پایه‌به‌رزی رێژیمی له پشته‌وه بوو و ئامانجی تۆقاندن و له نێو بردنی تێکۆشه‌رانی حیزب و له ئاکام‌دا، بێده‌نگ کردنی جووڵانه‌وه‌ی ره‌وای گه‌له‌که‌مان بوو.
ئه‌گه‌ر ناوه‌رۆکی تیرۆریستیی کۆماری ئیسلامی له سه‌ره‌تادا بۆ لایه‌نگرانی مافی گه‌لان و دیموکراسی و ئاشتی و ئاسایش له جیهان‌دا ناڕوون بوو، پاش بڕیاری ئازایانه‌ی دادگای بێرلین، که له‌ودا رێبه‌رانی کۆماری ئیسلامی وه‌ک تاوانبارانی سه‌ره‌کیی ئه‌و تاوانه مه‌زنه ناسێنران، تیرۆریست بوونی کۆماری ئیسلامی به‌شێوه‌ی یاسایی سه‌لمێنرا و دڕنده‌یی سه‌رانی ئه‌و رێژیمه و بێڕێزی و بایه‌خ دانه‌نانی ئه‌وان بۆ به‌ها و یاسا نێوده‌وڵه‌تی‌یه‌کان، زیاتر ئاشکرا بوو. ئێستا ئیتر ره‌چاوکردنی سیاسه‌تی تیرۆر و تۆقاندن له‌لایه‌ن کاربه‌ده‌ستانی رێژیمی کۆماری ئیسلامیی ئێرانه‌وه چی دیکه له که‌س شاراوه نییه. ته‌نانه‌ت شێوازی جێبه‌جێ کردنی تیرۆره‌کانیش بۆ هه‌موان ئاشکران. به ده‌رچوونی دوو فیلمی موسته‌نه‌د له‌سه‌ر تیرۆری تێکۆشه‌رانی حیزبه‌که‌مان، به‌تایبه‌ت تیرۆری شه‌هید کامران هیدایه‌تی و شه‌هید که‌ریم محه‌ممه‌دزاده، له‌لایه‌ن رۆژنامه‌وانی سوئیدی، (ئۆسکار هێدین)ه‌وه باشتر و روونتر کرده‌وه تیرۆریستی‌یه‌کانی کۆماری ئیسلامی په‌رده‌یان له‌سه‌ر هه‌ڵ‌ده‌درێته‌وه و بۆ رای گشتی ئاشکرا ده‌بن.
به‌گوێره‌ی ئه‌و زانیاری‌یانه‌ی له‌و فیلمانه‌دا درکێندراون، تیرۆری تێکۆشه‌رانی حیزبه‌که‌مان به سێ قۆناخ‌دا تێده‌په‌ڕێ: له قۆناخی یه‌که‌م‌دا، گرووپێک گه‌ڵاڵه‌کان داده‌ڕێژێ. له قۆناخی دووه‌م‌دا، گرووپێکی به‌رپرس و خاوه‌ن ده‌سه‌ڵات په‌سندیان ده‌کا و له دوا قۆناخ‌دا، کۆماندۆی تیرۆر دڕندانه و به‌و په‌ڕی بێ‌به‌زه‌یی‌یه‌وه ده‌که‌وێته گه‌ڕ و پلانه‌کان جێبه‌جێ ده‌کات.
له پرۆسه‌ی تیرۆری تێکۆشه‌رانی حیزبه‌که‌مان به‌گشتی، رۆڵی کاریگه‌ری به‌ناو باڵوێزخانه‌کانی کۆماری ئیسلامی له به‌ئه‌نجام گه‌یاندنی تیرۆره‌کان‌دا جێگای سه‌رنج و لێوردبوونه‌وه‌یه. ئه‌و به‌ناو باڵوێزخانانه، له کاتی جێبه‌جێ کردنی تیرۆره‌کان‌دا، له‌لایه‌ک شوێنی حه‌وانه‌وه‌ی تیرۆریستان بوون و له‌لایه‌کی دیکه‌ش، به له ئیختیارنانی ئوتومبیلی سه‌فاره‌تخانه، رێگای تیرۆری موخالفین‌یان بۆ کۆماندۆی تیرۆر خۆش کردووه و کارئاسانی‌یان بۆ کردوون.
به‌ڕێزان!
ئهوهی له پێوه‌ندی له‌گه‌ڵ تیرۆری ئه‌و دوو شه‌هیده‌دا، بۆ هه‌موو ئه‌ویندارانی ئازادیی گه‌له‌که‌مان و گشت ئازادیخوازان و لایه‌نگرانی ئاشتی، دیموکراسی و مافه‌کانی مرۆڤ له جیهان‌دا ده‌بێ جێگای داخ و نیگه‌رانی بێت، ئاشکرا نه‌کرانی تا ئێستای ئه‌نجامده‌رانی ئه‌و دوو کرده‌وه تیرۆریستی‌یه‌یه، که بێگومان بێجگه له کۆماری ئیسلامیی ئێران ناتوانێ که‌سی دیکه‌ی له پشته‌وه بێت.
خاڵێکی دیکه‌ی جێگای سه‌رنج له سه‌ر کرده‌وه تیرۆریستی‌یه‌کانی کۆماری ئیسلامی له وڵاتی سوئیددا، نه‌رمی نیشاندانی پۆلیسی ئاساییشی سوئید له مامه‌ڵه کردن له‌گه‌ڵ تیرۆریستان‌دایه. هه‌ر به‌گوێره‌ی فیلمی موسته‌نه‌دی "کۆماندۆی تیرۆر" یه‌کێک له‌و تیرۆریستانه‌ی که ویستبووی باڵوێزی سعودیه له ستۆکهۆڵم تیرۆر بکات و ناوی "عه‌بدولڕه‌حمان به‌نی‌هاشمی"یه، به‌بێ لێپرسینه‌وه و دادگایی کردن، له‌لایه‌ن پۆلیسی ئاساییشی سوئیده‌وه ده‌نێردرێته‌وه بۆ ئێران. هه‌ر ئه‌و تیرۆریسته چوار ساڵ دواتر، تاوانی میکونوس به‌ڕێوه ده‌بات. ئایا ئاوا کردارێک، به له‌به‌رچاو گرتنی رێز و بایه‌خی ئێجگار زۆری گه‌ل و حکوومه‌تی سوئید بۆ مافه‌کانی مرۆڤ، جێگای پرسیار و له هه‌مان کات‌دا مایه‌ی سه‌رسوڕمان نییه؟
به‌و هیوایه‌ی زۆرتر له‌وه نه‌خایه‌نێت و تاوانبار یان تاوانبارانی کرده‌وه‌ی نامرۆڤانه‌ی تیرۆری شه‌هیدان کامران هیدایه‌تی و که‌ریم محه‌ممه‌دزاده بۆ رای گشتی و به‌تایبه‌ت بۆ حیزبه‌که‌مان ئاشکرا بکرێت و تیرۆریستان سزای عادڵانه‌ی خۆیان وه‌رگرنه‌وه.
به هیوای ئه‌و رۆژه‌ی خۆری ئازادی وڵاته‌که‌مان رووناک بکاته‌وه و له‌گه‌ڵ بنه‌ماڵه‌ی به‌ڕێزی شه‌هیدانی دووروڵاتمان و باقیی شه‌هیدان رۆژی 10ی خاکه‌لێوه له کوردستانی ئازاددا رێز لێ بگرین.
هه‌زاران سڵاو له گیانی پاکی شه‌هید کامران هیدایه‌تی و شه‌هید که‌ریم محه‌ممه‌دزاده و گشت شه‌هیدانی سوورخه‌ڵاتی حیزب و گه‌ل.
مردن و سه‌رشۆڕی بۆ رێژیمی تیرۆریستپه‌روه‌ری کۆماری ئیسلامیی ئێران
* ئه‌م نووسراوه‌یه به‌بۆنه‌ی 10ی خاکه‌لێوه، رۆژی شه‌هیدانی کوردستان، رۆژی 13ی خاکه‌لێوه‌ی ئه‌مساڵ له‌سه‌ر گڵکۆی شه‌هید کامران هیدایه‌تی، ناسراو به شه‌هید ئه‌بووبه‌کری هیدایه‌تی له‌لایه‌ن نووسه‌ره‌وه خوێندرایه‌وه.
شه‌هید کامران هیدایه‌تی له ساڵی 1996 و شه‌هید که‌ریم محه‌ممه‌دزاده له ساڵی 1990 له‌لایه‌ن تیرۆریسته‌کانی کۆماری ئیسلامیی ئێرانه‌وه له وڵاتی سوئید تیرۆر کران و په‌یکه‌ری پاکی هه‌ردوو شه‌هید له دوو گۆڕستانی جیاواز له ستۆکهۆڵم نێژراون.